جۇڭگو كومپارتىيەسى مەركىزىي كومىتېتى سىياسىي بىيۇروسى دائىمىي كومىتېتىنىڭ ئەزاسى، گوۋۇيۈەننىڭ مۇئاۋىن زۇڭلىسى دىڭ شۆشياڭ 11-ئاينىڭ 25-كۈنى بېيجىڭدا ليۇكسېمبۇرگنىڭ مۇئاۋىن باش ۋەزىرى بېتتېل بىلەن كۆرۈشتى.

دىڭ شۆشياڭ مۇنۇلارنى بىلدۈردى: جۇڭگو بىلەن لىيۇكسېمبۇرگ چوڭ-كىچىك دۆلەتلەرنىڭ ئىناق بىللە ئۆتۈشى، ھەمكارلىشىپ تەڭ پايدا ئېلىشىنىڭ ئۈلگىسى. رەئىس شى جىنپىڭ بىلەن لىيۇكسېمبۇرگ رەھبىرىنىڭ ئىستراتېگىيەلىك يېتەكچىلىكىدە، ئىككى تەرەپ مۇناسىۋىتى ياخشى تەرەققىي قىلىپ، ھەر قايسى ساھەلەردىكى ھەمكارلىقتا مول نەتىجىلەرگە ئېرىشتى. جۇڭگو لىيۇكسېمبۇرگ بىلەن داۋاملىق ئۆزئارا قوللايدىغان ياخشى دوست، تەرەققىيات ئۈستىدە تەڭ ئىزدىنىدىغان ياخشى ھەمراھلاردىن بولۇپ، «بوشلۇق يىپەك يولى»، كەسىپ زەنجىرى، تەمىنات زەنجىرى، پەن-تېخنىكىدا يېڭىلىق يارىتىش، يېشىل تىپ ئۆزگەرتىش قاتارلىق ساھەلەردىكى ھەمكارلىقنى سىجىل چوڭقۇرلاشتۇرۇپ، قورۇقچىلىققا بىرلىكتە قارشى تۇرۇپ، جۇڭگو-لىيۇكسېمبۇرگ، جۇڭگو-ياۋروپانىڭ ئېچىۋېتىش داۋامىدا پۇرسەت ۋە مەنپەئەتتىن بەھرىلىنىشىگە تۈرتكە بولۇپ، تەڭ تەرەققىياتنى ئىشقا ئاشۇرۇشنى خالايدۇ.

بېتتېل مۇنۇلارنى بىلدۈردى: لىيۇكسېمبۇرگ جۇڭگو بىلەن ھەمكارلىق يېڭى ئەندىزىسىنى ئۈزلۈكسىز كېڭەيتىپ، پۇل مۇئامىلە، ئەشيا ئوبوروتى، يېڭى ئېنېرگىيە قاتارلىق ساھەلەردىكى ھەمكارلىقنى كۈچەيتىشكە تىرىشىدۇ، ياۋروپا-جۇڭگو ھەمكارلىقىغا تۈرتكە بولۇشتا ئىجابىي رول ئويناشنى خالايدۇ.

تەرجىمان: ئامانگۈل ھەبىبۇللا

سېلىشتۇرغۇچى: ئادىل ئابلەت